Հայկական անիմացիան այսօր ապրում է հակասության մեջ։ Մի կողմից՝ մեր անիմատորները աշխատում են միջազգային ստուդիաների հետ, ներկայանում փառատոներում, մրցում համաշխարհային որակի նախագծերի կողքին։ Մյուս կողմից՝ Հայաստանում գործող մասնագետների թիվը հազիվ հասնում է 300-ի, իսկ միջազգային չափանիշներին համապատասխան կրթական համակարգ գրեթե չկա։ Ստուդիաները, այդ թվում՝ «Պոպոկ» անիմացիոն ստուդիան, փաստում են՝ կադր կա, բայց համակարգված աճի միջավայր չկա։ Շատերը հմտանում են այստեղ, հետո տեղափոխվում արտասահման, որովհետև մեծ նախագծերն ու կայուն ֆինանսավորումը դրսում են։
